2013年1月26日特別業主大會

2013年1月26日特別業主大會, 由鬍鬚仔以5%的業主聯名召開。

呢個會, 只係有兩個議決,

1. 議決推翻海景花園業主立案法團第10屆管理委員會於2012年12月5 日之特別會議內議決終止新昌管理服務有限公司的管理服務合約的決定；

2. 議決是否終止新昌管理服務有限公司的管理服務合約。

並無其他議決.

**************************************************************************

法團於12月12日出信解僱新昌管理公司後, 兩天後向業主發出信件, “終止新昌管理公司合約理由”, (注意, 信件日期為12月3日), 提出三點;

1.地政署修樹函件被拖延約四十五天, 管理公司失職

法團提出, 鋸樹實屬「必要」,「若萬一因拖延處理而其間發生交通意外, 全部海景花園的業主均須承擔巨額賠償費, 管理公司會否替業主承擔呢?」

但實情是, 地政總署的信件,到底有無限期?? 有無要求工程須獲得地政總署批准? 係進行任何必要的樹木工程前, 要唔要先諮詢註冊園境師的意見做評估??

鬍鬚仔可以答你, 法團無做!!!!參考信件(地政署的回覆)

我都只係照copy and paste, 「若萬一因法團眾委員鋸樹而令海景花園被控告或罰款, 全部海景花園的業主均須承擔巨額賠償費, 主度及委員們會否替業主承擔呢?」

呢個問題, 我問咗法團 (參考信件), 法團唔肯覆.

同時, 在10月20日的會議記錄中,第3.5項,對於地政署修樹函件,「主席要求管理公司須聯絡王氏利豐將評估費用下調至$1,500, 管理公司表示會盡快回覆。」

既然緊急, 既然須承擔巨額賠償費, 何解法團只係講價而無做作何決定?? 而係十三日後, 突然醒起呢單嘢好緊急, 突然決定「鋸樹??」

法團一再提到管理公司不專業, 但實情是,10月20日的會議記錄3.5項, 管理公司以其專業向法團解釋,「本苑之地契有樹木保育條款, 故地政署現要求法團於處理前必須委託園藝及樹木護理專業人士進行評估及進行修補及治理」。

法團豈可將「無知/不專業」的責任推給管理公司?? 文件, 證據, 絕對不會騙人。

2.管理公司凌駕於法團

法團認為管理公司自把自為, 事先引入有意提供電訊服務公司的職員進入屋苑進行堪察, 同上, 事前亦沒有知會法團。

但按照2012年11月14日的會議記錄4.9項 有以下記載,

「委員黎浩強續查詢於6月6日管理公司於和記視察屋苑的安排, 管理公司(與)當時在任的一名委員一同視察, 而管理公司亦沒有擅自批准工程。」

6月6日, 當日是由法團委員陪同和記一同進行堪察, 提交建議書, 管理公司蓋章收取, 6月30日提交動議, (2012年6月30日的會議記錄4.2項, 和記寬頻早前交來計劃書, 希望可於本苑增設有關服務。 有委員表示先再詳細研究有關計劃書。) 7月12日, 管理公司電郵通知和記有關申請未獲法團通過故拒絕有關申請。

11月3日和記在青榕街舖設光纖, (在屋苑外圍), 與我們何干?? 這個解僱理由是否成立??

(參考文件, 法團致管理公司的警告信)

3.為何所有工程皆要新昌總公司批核??

法團認為, 於9月份批核修理兒童遊樂場的保護軟墊, 新昌截至12月3日仍未完工。

參考10月20日的會議記錄, 3.4項,「法團早前開標並初通過委托捷時進行更換遊樂場安全軟墊工程, 並於是次會議補決」

「管理公司已通知捷時有關事宜, 工程預計於11月中展開。」

參考11月14日之會議記錄, 4.9項,

「有關工程於10月20日之管理委員會中議決, 由於承辦商送貨須時兩個月, 管理公司於會前多次聯絡承辦商, 承辦商回覆預計下星期送貨並會安排安裝。」

欲加之罪, 何患無詞??

*******************

唔係喎, 鬍鬚仔, 法團有人打電話問佢拿授權書, 所講的內容唔係咁架喎. 講一大輪, 完全係兩回事, 鬍鬚仔會想請問, 既然法團有咁多理據, 管理公司非炒不可, 點解, 我地一班業主想問你, 你完全龜縮???

鬍鬚仔出信問你關於鋸樹問題, 唔覆。

12月5日成班業主等你開會, 你o個個開咗兩分鐘的會, sorry, 好多業主都唔覺你係會場喎;

12月29日, 成班業主天寒地凍等你想問你關於鋸樹同炒管理公司的理由, 你話係AOB時間大家討論, 但一去到AOB, 你即刻雞咁腳走咗去.... 成班等你的業主O晒嘴喎.

一個人講咗, 負唔負責任, 就係睇佢肯唔肯用文字/開會來記錄佢的話語, 因為, 文件容易證明係咪講緊大話, 係砌詞狡辯定係以理服人, 講過的說話你可以抵賴, 但寫低的文字/會議記錄, 則千秋萬世, 人人睇到的都係一樣的話語.

各位業主曾經留低電話俾管理處/法團作緊急通知之用, 但法團拿呢D電話打俾各位業戶, 係咪不當使用個人資料, 各位可以自己決定點去做; ( 參考個人資料(私隱條例)附表一第三條, 第3原則, 個人資料的使用)至於法團天花龍鳳咁去講幾大堆問你拿授權書的理由, 鬍鬚仔建議你地叫法團學我咁, 以白紙黑字, 以文件, 用理據咁去講, 要對自己講O既說話負責任; 鬍鬚仔堅持做公職要 「開誠布公」.

我地不斷咁希望法團同我地講原因, 你唔肯, 但擰轉頭就猛同某部份業主不斷咁去打電話講, 不如將理由公開, 等大家一齊傾吖. 我地海景業主, 唔係唔識睇文件, 唔係唔識思考架喎!!!

因為好多人都未必睇網誌, 我將以上呢篇文章, 撮要寄俾各位業主, 同時亦要就我所講的說話提供證據, 以佐各位投票決定時考慮!

到底， 法團知唔知乜叫做公職？？

公職， 即係係為眾服務， 係唔係個個都明白點去做？？

公職唔係無上權威， 唔係成為皇帝， 相反， 公職， 正正就係要無私，透明。

而家法團不斷咁去拿授權票， （其實， 鬍鬚仔何嘗不是？？）， 但， 大家有無聽到好多從未曝光的理由？？

有街坊話， 法團不斷咁去講管理公司好多問題， 又話人地食錢， 又話人地工程報價貴。（貴你咪唔揀佢LOR， 咁都炒得？？佢貴你都揀其他工程公司啦？）

請問， 既然係有咁多不滿， 法團有無開過會， 將呢D不滿正式向管理公司講？？

有無出過信， 要求人地解釋？？

公職， 就係做乜， 諗乜， 都要留低證明， 你有無唔妥， 白紙黑字咁俾人知， （包括我地）， 人地回覆， 亦要向番大家展示。

咁法團有無咁做先？？？

而唔係你地幾個人串串是非， 無憑無據的講下就算。

法團只係出過兩封警告信， 而之前炒人， 向住戶派信， 所提的理由亦只有三個。何解突然間又多咁多是非？？

有個好支持法團的街坊有人同鬍鬚仔講， “D （原文係粗口）， 炒佢咪炒K佢LOR， 駛L俾理由呀。”

如果係你的家事， 你的公事， 鬍鬚仔無權去干涉。但而家講的係公職， 係屋苑的事， 炒或被炒， 唔通我地業主無權知？？ 定係你地有乜唔想俾我地知？？

鬍鬚仔忽發奇想。。。。如果新昌真係要走， 下一間管理公司， 服務我地屋苑的人， 係黃子興先生？ 定係陳子儒先生？？

如果真係中， 大家買六合彩， 記得問鬍鬚仔拿貼士！

到時咪問鬍鬚仔， 點解撞到撞得中？？ 天機不可洩露也！

寧願輸得漂亮， 都不去為勝利而無耻

多謝各位街坊的報料， 有人不斷借部戶外升降機去拿授權書，

有D聽到係， 如果想起得成部戶外電梯， 就要俾授權書法團，

亦有D聽到係， 星期一見到鬍鬚仔， 管理處同戶外電梯顧問開會， 不斷咁去質問人， 話鬍鬚仔同管理公司， 都係想推翻唔整部戶外電梯， 所以， 管理公司非“炒”不可。

對於我之前同顧問開會所講的說話， 我已經係早幾日放係個BLOG度， 正大光明， 屈得出， 我鬍鬚仔受得起。

我斷唔會為咗要贏， 明知個合約有咁多漏洞都唔去填補； 鬍鬚仔一向性格都係咁架啦。

但， 有好多支持鬍鬚仔的公公婆婆去幫手拿授權書， 點解都要誣告埋呢D公公婆婆？？ 點解要講到人地公公婆婆有利益收受， 講到人地係為錢去做事？？

我同呢班公公婆婆講， 唔駛一定要勉強去拿授權票， 唔好再俾人詆譭， 佢地反而調翻轉頭來安慰我， 話唔緊要， 只要求我去做個澄清，佢地仍然希望能為我多拿幾張票。

如果， 只憑法團講幾句大家就信到十足的人， 這些票， 不要也罷。

我不為權不為其他， 只是將我認為海景的問題說出來， 如果得不到支持， 這， 也是海景街坊的選擇。

衷心感謝一直義務幫助我去拿票的各位街坊（無計， 鬍鬚仔識人唔多）， 我是勝亦欣然敗亦喜， 因為， 我已嬴得你們的支持，我只做我該做的事！

寧願輸得漂亮， 都不去為勝利而無耻！！！

向戶外電梯顧問公司郭浩提交報告

業主代表向戶外電梯顧問公司（郭浩）提出的幾點疑問報告

出席者 ： 戶外電梯顧問公司（郭浩） 代表

      海景花園業主立案法團主席  李淑玲女士

                   2座2B業主代表，2座15B業主代表， 3座22B業主代表

                   3座2位業主代表

                   管理處陳經理， 甘小姐

地點 ： 海景花園多用途室

時間 ： 約11：45分

是次會議， 主要是由業主代表向戶外電梯顧問公司反映業主對工程的疑問以及希望就合約澄清， 大家同意就各項疑問及希望澄清事宜， 編製報告， 由管理處或業主立案法團向顧問公司提出， 希望得到顧問公司的回覆。

1.     就顧問公司的合約， 內裡提及興建該戶外電梯， 有一個“封頂價”， 業戶提出， 該封頂價是否包括VO （Variation Order) 及AI （Architecture Instruction)？ 換句話說，工程總價會否超過封頂價？？ 業戶希望顧問公司澄清， 讓法團及業戶免於誤會。

2.     業戶希望， 如果工程出現VO或AI， 必須要通知海景花園各業戶。（當然由法團決定通知的方法）。

3.     由於是次工程涉及多間公司， 例如電梯公司， 承辦商等，業戶恐防各不同的公司會就施工， 安裝，等出現爭拗， 責任的界定並不清晰， 希望顧問公司能就不同的問題及責任能加以確定， 避免將來問題發生而互相推卸， 業戶們根本不知該向那戶追討。

4.      

      

            承上圖， 業戶與顧問公司在現場拉尺量度， 發現地盤位置遠遠細於圖中      的OPEN CUT FOR FOOTING的要求， 顧問公司代表向業戶表示， 需就   該圖及施工方法將作出修改； 謹此記錄。

5.     承上圖， 有業戶表示， 圖中並沒有將任何視線所見的障礙物如柱躉， 樓梯， 花圃， 圍牆等繪畫在內，以及對於未能出現在視線範圍的障礙物如地下污水渠（如有）， 雨水渠等（如有）， 顧問公司能否出示圖則以則定施工方法， 但顧問公司未有作答， 謹此記錄。

6.     業戶表示，如果電梯頂能稍作傾斜， 是否能對電梯頂的去水更有幫助？ 顧問公司提出， 可在梯頂的水泥厚度稍作調整， 謹此記錄

7.     業戶表示，位於地下電梯門的雨簷， 是否可作修改而使其更穩固？ （業戶曾向顧問公司代表查問，如狗臂架等是否合適？ ） 顧問代表回覆將會研究，謹此記錄。

8.     業戶表示， 如在晚間， 光線不足， 雨簷上是否需要加裝照明設備？ 顧問公司代表回覆將會研究， 謹作記錄。

9.     業戶查問， 由於平台升降機門將會高於外圍的花圃， 接駁之斜台因較接近花圃外圍， 恐怕會對乘客做成意外， 又或因業戶的不小心，高空墮物而容易傷及在地下等待電梯之乘客， 希望顧問公司能提出解決方案。

10. 而在平台升降機接駁之斜台，需於斜台底部連接平台， 業戶恐防工序會傷及平台的防水層， 希望顧問能將提出在工序上不會破壞屋苑平台防水層之做法， 顧問公司代表未有作答， 謹此記錄。

11. 業戶亦要求， 所有連接所用的螺絲， 包括是安裝救生梯， 平台斜台， 接連石屎部份， 均指定採用＃316不銹鋼螺絲釘， 以便日後的維修。顧問公司代表未有作答。謹此記錄

12. 有業戶提出， 雖然顧問公司有指定施工準則按“General Specification for Building” published by Architectural Services Department, 2007 edition. 但為方便我們法團及業戶對工序的條件及規範較易掌握及監管， 建議將釘板扎鐵落石屎等工序的施工要求等， 都將之加在標書的內容， 避免承辦商以疏忽， 以及讓我們能簡單按文字理解。顧問公司未有作答， 謹此記錄。

13. 有業戶認為， 標書中對工程時間的限制太寛鬆， 而同時工程亦由多間公司參與， 為界定好工程的延誤由那一方負責， 亦同時避免由於我們未能作出時間上的配合而被索償， 建議， 承辦商的工程時間改為由收到開工紙起始作生效，而由於顧問公司代向電梯公司訂購， 故亦要求顧問公司在訂購電梯時作出送貨時間的要求， 利用合約去限定各部份的時間上配合， 顧問公司未有作答， 謹此記錄。

14. 對於在圖中表示的氣窗， 逃生門， 電梯口等， 雖然已經載於圖中， 但由於法團及各業戶對工程不是專家， 建議將所規定的尺寸， 要求等， 都全部寫在標書中， 以便大家有一個較簡單及容易監管的方法去作出驗收或計算， 顧問公司未有作答， 謹此記錄。

15. 業戶對於標書中對承辦商要求有合資格人士監工，要求指定該TCP的資格。顧問公司未有作答， 謹此記錄。

16. 業戶亦提出，標書的報價在設計上， 某些項目是否能連合在一起， 例如， 安裝閉路電線的管道， 應該同時指定安裝閉路電視， 以避免到時， 閉路電視未能運作， 但我們仍需要支付安裝閉路電線管道的費用等等， 顧問公司未有答覆， 謹此記錄。

由於顧問公司代表趕著離開， 業戶的意見亦暫時到此為止。本人謹將提出的各點製作報告， 並希望法團能代表業戶， 向顧問公司遞交此報告， 並責成管理公司去向顧問公司追問結果／答覆。

忙著執標書字眼

我先同大家更新一下戶外電梯工程的事件簿.

係2012年12月29日的會議上, 戶外電梯工程顧問(郭浩), 為海景花園業主帶來喜訊, 2012年12月20日, 屋宇署己經批準所繪畫的圖則.


理論上, 應該俾時間大家去討論下標書的內容， 然後先去招標， 但， 法團急不及待了。

法團已搶先公佈, 會在2013年2月下旬至3月份召開業主大會讓各業主投票選出興建升降機槽之承辦商.

2013年1月7日, 已經向有興趣的承辦商派標.

所以, 我地一定要係承辦商回標前, 就標書上面唔清晰的字眼, 唔清晰的指引, 界定責任等方面去修改/刪除字眼等....

鬍鬚仔同幾位熱心的街坊, 開了幾晚夜車, 睇晒並已盡量作出了修改, 向管理公司發出報告, 交給顧問公司審批, 希望能趕得切修訂標書.

份報告, 係2013年1月8日晚上03:00 左右完成.

請俾鬍鬚仔稍作休息, 我會再同大家解釋我地修改的原因及疑問.

先將原裝的標書俾大家做個參考.

Head List
第一部份, Instruction to Tenderer
第二部份, Form of Tender
第四部份, Preliminaries
第五部份, General Specifications
第六部份, Summary of Works
第七部份, Summary of Tender
第八部份, Summary of Material
第九部份, Drawing Appendix
Appendix 1
Appendix 2
Appendix 3
Appendix 4
Appendix 5
Appendix 6
Appendix 7

如果大家有時間, 亦想參與去討論呢個標書的問題, 歡迎電郵至 22bblock3@gmail.com

大維修工程缺憾報告

2013年1月4日, 晚上19:30, 一班熱心業主, 冒著嚴寒, 在青山公路的閱讀室, 商討如何撰寫海景花園大維修缺憾報告。

雖然我們有出信邀請, 但未能請得動法團主席及諸住委員來參與, 未免失色。

經過了約三小時的反覆討論, 按我們手上有的資料, 以及核對合約內的條文, 於2013年1月8日, 管理處已經撰寫好有關的報告, 已交法團審議, 期望在很短的時間, 送交顧問公司, 以便盡快得到他們的回覆, 並研制修繕工程的補充協議。

海景花園大維修缺憾報告

在此, 再次感謝出席的熱心街坊, 以及管理公司派出員工義務提供專業意見. 謝謝.

管理公司生死兩分鐘

大家試下用少少潮州音， 來讀以下句子。


＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

各位委員， 大家好。

今日係2012年12月5日， 今日到會的委員， 包括陳力華女士， 吳麗霞女士， 張運發先生， 黎浩強先生， 張伙有先生， 趙瑤輝先生， 而缺席的有黎綺芬女士。由於到會人數已符合法定人數， 我而家宣佈會議有效。

議程一， 通過是次會議議程。

請問有邊位動議？？ 好， 由我動議。請問有邊位和議？？ 吳麗霞女士和議，現在請大家舉手投票。

好， 大家一致舉手通過是次會議議程。

議程二， 商討及議決終止新昌管理服務合約。

請問大家有無意見？？ （呢度要停頓一下的， 因為議程係要商討， 所以要等委員諗下有無嘢講。）

如果無嘢講， 好， 由我動議， 請問有邊位和議？？吳麗霞女士和議， 現在請大家舉手投票。

好， 大家一致舉手通過， 全部同意終止新昌管理公司服務合約。

而家時間係20：35分， 我而家宣佈會議結束。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

我自己試過， 我用咗1分25秒讀晒以上的對白， 所以， 呢個兩分鐘的會， 入面所講的同以上的模擬對白差不多, 否則, 兩分鐘開唔晒。

爭在， 當時， 我見唔到法團開會之嘛， 相信當時十幾位街坊， 都一齊走漏眼。死火， 撞鬼了。

開個會， 同按一下橡皮圖章， 時間一樣啫。

戶外電梯通告

相信呢幾日, 大家都有睇到張通告係大堂同電梯,

因為鬍鬚仔近日要放所有精力係大維修的缺撼報告, 鬍鬚仔會係之後同大家討論呢個戶外電梯的PROJECT.

我真係唔明, 點解法團可以咁輕鬆?? 鬍鬚仔睇份標書, 睇到熊貓眼.

鐵定於2012年1月4日, 業主們商討有關大維修的缺憾報告

今天收到管理處的回覆,

XXX女士(鬍鬚仔太太)

我們已獲法團委員同意, 借出後閘旁多用途活動室以供業戶使用.

附件為有關邀請業戶參與會議的通告, 由於通告將張貼於各座大堂, 請勿於屋苑閘口派發傳單.

謝謝！

************************************************************************************

 

附件

 

討論海景花園大維修需修繕/跟進項目報告事宜

 

再次誠邀各位對工程/合約有認識, 或者對該大維修想知多D的街坊出席.

日期 : 2012年1月4日(星期五)

時間 : 19:00 - 22:00

地點 : 屋苑後閘多用途活動室

 

希望大家踴躍發言.

 

2012年11月24日的會議紀錄

之前法團與管理公司就鋸樹問題及和記光纖舖設等問題, 分別出信俾大家.

2012年11月24日的會議記錄, 亦有記載當時的討論.

謹此交給大家查閱.

連結 : 2012年11月24日會議記錄