到底, 我地而家係起部乜嘢電梯???

大家一直都聽到要起部電梯, 到底, 部電梯係點架?? 大家知唔知??

外表

法團自行替我們決定了, 電梯井道係用石屎, 清水板.

(此圖片中的是水塔, 但形狀及顏色等, 與我們構思興建的戶外電梯相似)

而清木板, 則指電梯石屎外牆, 就係大家成日行經的天橋躉, 表面較平滑的混凝土.

其實, 鬍鬚仔唔明白, 點解法團問都唔問下我地, 就一定堅持要咁做.

做部戶外電梯, 點解唔考慮下安全問題同成本同建造電梯的可行性.

要講呢幾點, 就一定要有比較, 其實, 我地個電梯點解唔可以起觀光電梯??

1. 安全性

相信, 人命安全係高於一切. 所以, 鬍鬚仔會首先考慮使用電梯者的安全.

石屎電梯井, 係密封的. 我地只可以靠幾部CCTV去瞭解電梯入面發生的情況. 無論係保安需要, 又或者係使用者的狀況, 任何人都一目了然. 尤其是, 萬一碰到電梯失靈, 在沒有電力的情況下, 外面人根本無法瞭解電梯內的使用者的情況. 而被困的使用者, 在一片漆黑的環境, 無助, 亦無法向外求救, 在興建戶外電梯前, 此點不可不考慮.

再講, 若預到緊急情況, 玻璃外牆及電梯, 便於讓消防馬上以打破玻璃的方式拯救, 會否較有效率? 會否較為便利?? (在人命關天的情況, 所有的損失都不及一條人命)??

法團話起部電梯主要係老人家用， 困電梯事件時有所聞， 試想像， 烈日當空老人家半天吊困在石屎井中，部電梯並不是層層停可以隨時救人。。。。。鬍鬚仔唔係咒會有意外， 但呢個擔心係咪多餘？？

13人困𨋢20分鐘 女乘客嚇至哮喘病發

2. 成本

鬍鬚仔唔知道玻璃同石屎的價格相差多少. 在維修的成本相差多少, 但起碼, 在維修上, 將璃璃外牆拆下維修, 又或者將來不同的零件維修(甚至將來可能換電梯), 只需要將外牆玻璃拆下更換, 是否會較便捷?? 在檢查時, 可以在不同的地點用肉眼便可看到零件運作, 更有效率?? 鬍鬚仔深信, 頂先製造玻璃組件, 比起要用石屎紥鐵釘板, 在建造上應該更便利, 成本應該較低.

3. 建造的可行性.

要用法團建議的石屎電梯井道, 建造過程應該有三個程序, 釘板紥鐵落石屎. 釘板紥鐵, 由於建造的井道細, 對釘板及紥鐵工人的技術要求較高. (都無位企, 好難做), 再講落石屎, 到底, 石屎該由那裡傾倒??

看官不可不知, 石屎, 由混凝土廠出廠開始, 兩小時內一定要使用, 否則, 該石屎就不能再用. (因為會凝結, 會影響石屎的結構), 而混凝土本身由石粒, 水泥等混合, 傾倒的高度不可以超過三米, 否則, 石粒因較重會聚於底部, 沙漿等於聚於頂部, 密度不平均, 會做成裂紋, 甚至倒塌.

回看我們海景花園的位置, 在做電梯底部時, 可將混凝土由青山公路用螞蟻搬家的方式用人手傾倒, 但當超一兩層樓高, 如何去做?? 讓工人一桶一桶爬上去倒??
由七八座的平台倒下來如何?? 第一, 超過上述的三米要求, 第二, 平台有負重的限制. 載滿混凝土的斗車, 如何進入本屋苑?? 如何停在平台??

轉接的運載, 又如何去符合混凝土兩小時使用的要求??

而混凝土亦有溫度的要求, 在炎炎的夏日施工, 在傾倒混凝土時, 要加進冰粒來降溫, 轉拆的傾倒石屎工序, 冰粒何以發揮降溫的功效??

除了落石屎工序的問題, 大家亦要考慮到戶外電梯的壽命問題.

如果鬍鬚仔問你地, 石屎的電梯井, 同玻璃的電梯井, 那個較輕?? 相信你們都可以解答到. (起碼, 石屎厚過玻璃, 重量一定無得比)

此時, 就要考慮戶外電梯的沉降問題. 估計我們以石屎去興建的電梯井道, 重約90噸. 而戶外電梯採用獨立樁腳, 沉降速度與海景花園整個建築有所不同. (1-4座同5-8座的沉降都不同以停車場的接口位, 全部出現裂痕及有高低)

電梯糟越重, 越容易出現沉降, 而沉降可以唔一致的, 如果電梯糟的一邊沉降比另一邊快, 電梯就會好似比薩斜塔咁, 到時, 用唔到之餘, 拆除或重新興建, 都係另一個大家要頭痛的問題.

*******************************************************************

雖然法團不斷同人講, 話鬍鬚仔係反對派, 但鬍鬚仔從來無反對過起電梯. 但法團係決定起電梯後, 到底有無向過業主交待起D乜?? 點起?? 點解要用我地D錢, 但從來無俾機會我地對設施做過決定??

如果主席比我地有學問, 有識見, 有經驗, 代我地去決定同處理, 都仲情有可原. 而家硬要我食件咁O既, 替海景花園起一個神主牌式的戶外電梯, 加外, 唔安全, 成本高, 風險大, 點解你唔肯用一個成本較平的方法??

法團實話, 好多嘢無得商量, 因為, 乜都要快....

快?? 訂部電梯, 係要八個月時間..... 相對呢個咁長的訂貨期, 要去聽下民意, 要去收集意見, 減低興建的成本, 會拖慢幾耐??

法團乜都想快, 只想快快簽合約, 但自己乜都唔識, 乜條款都唔睇, 只會不斷在工程細節出問題, 因快得慢.

我從來無反對起電梯, 只係反對你獨斷獨行, 而又乜都唔識, 結果替海景帶來災難. 大維修你所簽的合約, 你的監管, 你的決定, 有目共睹.


各位業主, 我唔係建築業的專家, 如果我上邊所講的有乜講錯, 請加以糾正. 鬍鬚仔拋磚引玉, 等大家的真知灼見.