續, 富多來二期的法團

上一篇網誌, 到底係件乜嘢事??

呢一單事件, 係好多法團都好興玩的事-官司, 所以值得大家當係一個實例來研究下.

富多來二期溶溶爛爛, 人所共知, 係兩年前, 屋苑業主用選票, 將舊一屆的主席趕走.

舊主席要落台喎, 當然玩晒嘢, 又唔肯交收文件, 又唔肯交收瑣匙, 而夥同一班業主, 係每次常委會攪局, 這些, 大家都估得到.

新一屆法團, 見到法團會址的電腦殘殘舊舊, 又同法團購買的電腦單據上的型號不同, 即係有人取走了法團所購買的電腦, 同時取得屋苑所有業主的資料, 當然報警啦, 合情合理.

事件拉拉扯扯達七個月, 最後, 舊主席將法團電腦送返法團.

事情完未?? 未完.

舊主席話, 點解法團要係會議中討論佢"涉嫌偷取電腦"喎, 於是, 向法團入稟, 向法團, (即係全體業主)訴訟, 告大家"誹謗"佢.

呢件事, 加上佢不斷煊染, 話個管委會處理不當, 累及所有業主, 新主席亦不堪壓力而辭職.

舊主席順利借呢單案件, 從新進入成為委員.

精彩的事來了, 由於佢成為委員, 於是佢亦不斷向管委會施壓, 要求管委會代表法團同佢本人協商和解, 要求法團向佢本人賠償八萬五千元... (加上之前法團所用的律師費), 總共花費十五萬多.

而案件呢?? 哈哈, 只係入稟, 都未開始進入審訊. (係預審時, 法官已經直斥話件案件係無謂.)

換句話講, 成功利用司法程序, 佢一毫子都唔駛出, 由全體業主埋單. 佢就係睇準所有業主怕事, 怕煩, 凶下班業主, 要打官司就可能天文數字, 邊個仲出到聲??

舉行業主大會來做議決, 佢手執的授權票, (約千四份), 係全體出席投票的份數中(約2400份), 佔了超過半數通過和解方案, 一單必須的官司, 結果都係由所有業主找數.

鬍鬚仔係度同大家講, 一個鍾意郁下就玩官司的管委會, 你一定要留意. 亦真心要睇下大家去打官司的理據係邊. 只要今次你妥協, 就會不斷咁觸發以後佢繼續用同一招逼你就範.

試問, 一個舊屋苑, 到底你有幾多個十五萬可以去玩呢個遊戲?? 大家交管理費, 都係想用在屋苑, 維修或者改業設施, 但不斷用來打官司身上, 到底係為咗乜??

既然已經完左, 十五萬換回和平, 係咪值得?? 我唔知, 但以我知, 呢個管委會已經馬上再安排咗幾單官司繼續, 包括同舊的管理公司打, 又話要向前屆管委會追討責任.

每個屋苑發生衝突, 離唔開兩招, 官司同抹黑. 呢個屋苑, 就係玩官司玩到出神入化. 如果你有朋友係呢個屋苑的業主, 緊記叫佢地關心下屋苑, 否則, 多多錢都唔夠你花.

願上帝賜給這個屋苑的業主智慧, 讓他們用理智去阻止呢場連串的官司.

有住戶要求幫忙的屋苑－富多來新村

其實都有好多唔同的讀者要求鬍鬚仔幫忙。

有很多都是大家交換意見。

而實則參與的，都有幾個屋苑，其中一個，係大角嘴富多來新村。

（願諒鬍鬚仔未能個個屋苑都幫忙。但有一些古怪陸離而屋苑內老人家較多的，鬍鬚仔會參與較多）

呢個屋苑的CASE，鬍鬚仔會用第三身的手法來講。當中，最搶眼球的，就係業主同法團中間的一單官司。

鬍鬚仔先將有關文件放係度，等大家先睇完文件，再係下一個網誌以故事形式來講下。

DCCJ3646/2013  (一宗誹謗案件）

誹謗案中提及的會議記錄

原告人在案件前的律師信

呢個故仔，好吸引下的。希望大家睇完文件，下一篇網誌再講。

網誌的轉營

基於海景花園的管理運作已回復正常，所以這個網誌已有一段時間沒有更新。

因為，有關海景花園的一切事宜，已可以直接在屋苑張貼通告，提高透明度。

但近來收到為數不少的網友，（相信都是非海景的街坊），都希望鬍鬚仔能繼續寫關於屋苑的管理等等話題。

能吸引更多讀者，讓香港其他屋苑都能提高管理質素，亦是鬍鬚仔所樂見的。

所以，這個網誌，會繼續探討有關這個話題。但已超出了海景花園的範圍，而是會提及很多找鬍鬚仔幫忙的屋苑的一些事宜。

基於鬍鬚仔已是中年人，對電腦認知有限（寫到這個BLOG己經是電腦知識的顛峰），所以，對於裝飾這個BLOG，增加照片提高閱讀趣味等，對不起，這個對我來說比寫BLOG更困難。

或者，如果有其他讀者願意幫忙，鬍鬚仔無任歡迎。

往後的網誌，是涉及其他屋苑的問題，海景街坊如果有興趣，可以繼續閱讀。

感謝各位一直以來的厚愛。謝謝。

屋苑的財政預算

致各位海景花園的業主，

近日管理委員會已經將屋苑2014年度的財務預算案供大家參考。

屋苑的財務預算， 是參考屋苑過去的開支， 加上通脹或其他項目的考慮，計算出每一年屋苑將會面臨的開支。

例如，管理公司的保安，清潔費，電費差餉， 以及屋苑的維修， 或需按照政府的規定需要改善屋苑的設施等等。

我們「預計」屋苑的開支， 按照量出為入的原則，變成我們需要多少「收入」來支持這個開支。

這才會計算出，如果大家沒有「反對」這些開支，便需提高管理費的收入。（初步計算是增加約為20﹪）


管委會是希望大家先瞭解管理費收入是按照這個原則來行事。


而業主們， 是可以就「管理委員會」提出的財務預算（即開支）來提出意見，甚至反對。


例如， 有業主透過WHATSAPP同鬍鬚仔建議， 是否可以於晚間減少管理人員數目，不設座頭， 以便減少保安員的開支。。。。


這類建議， 管理委員會希望大家在財務預算公布的十四天內， 以書面（求其寫幾隻字， 起碼要讓管委會知道是哪位業主的提議）向管理委員會提出。

管理委員會是開誠布公的， 業主提出的意見，能節省開支，那量出為入的原則， 便可削減管理費的加幅。


這便是財務預算公供的原因及機制。

對開支，收入， 服務， 各業主都會有不同的意見，而歸納這些意見， 我們可以透過諮詢會，甚至業主大會， 來取得數據而讓管委會去執行。

我們管委會，並不是海景花園的主人，我們是聽取各業主的意見及指示方向來行事。而業主們亦應該得知，屋苑每月的開支數目，以及金錢的限制，可能會較體諒管理委員會的決定。

維修開支減少，那麼， 對於重大維修，管委會就會按維修的金額向業主集資，（例如屋苑的電力檢查WR2， 或者水泵的更換， 以求政府條例上要求屋苑改善的設備等）

保安人員減少，屋苑業主是希望利用科技（如八達通的加建），以便長遠減少管理員的開支，還是直接削減人手，這一些， 只要業主們有共識及取向，管委會便容易去執行。

既然管理費是業主關心的事， 同樣地， 屋苑的開支理應亦是業主關心的事。

希望各位業主能抽出寶貴的時間，去正視屋苑的開支狀況，並提出建議。

候教。