義務書記的反思

尋日寫的網誌， 打了一毎啞謎。會議議程的其中一點，

5.1, 商討及議決委任法團義務書記協助管委會處理文書及日常事宜

問題係邊？？ 

首先， 只要睇過法團主席一貫的文筆及處事能力， 今次個議程編排， 一定有高人指點， 正主兒來了。

1。職責問題， 

我地出來社會就業， 先唔講薪金高低（甚至義務）， 都有JD。（Job Description). 

法團一樣，你主席要做D乜， 你秘書要做D乜， 司庫有乜責任， 法律寫晒出來， 所以， 我地可以對佢地的責任有要求， 例如， 要求佢按法例規定要準時召開週年業主大會。

呢D，就係我地係大會中講的規矩。

今日， 呢個職銜係“書記”，話就話處理文書及日常事宜， 細心D諗下， 法團各人佢地的工作， 唔係正正都係處理文書及日常事宜？？ 

書記， 只係一個職銜， 重要的， 係佢的權責係乜， 點訂。

習近平都係一個“總書記”， 咁佢同“秘書長”， 點分工？ 邊個大？？權責有乜分別？？

如果法團係要“聘請”呢位書記， 咁，佢地就要準備“合約”， 雖然係“義務”即係唔駛錢，但合約係要講明佢的權責。

例如， 委員如果唔稱職， 我地可以用業主大會撤換， 如果委員以權謀私， 我地可以去廉署舉報。

但如果係一個唔係法團的人呢？？ 佢就唔需要同我地所有業主負責。當日程介南先生以職權可以睇到好多政府資料， 結果以此謀生而被判罪。許仕仁先生亦因為透露政府資料而被起訴， 當然， 海景住戶的資料， 或者海景花園的財務狀況， 甚至不同公司的合約價格， 唔算得好大銀碼，但呢D資料， 係咪可以隨便搵一個無認受性的人就可以隨便“享用”？？

回想起， 鬍鬚仔當日向法團查詢有關屋苑的合約， 主席都以“機密文件”來回覆， 結果維修費乖乖奉上， 只要法團肯按公平公正公開的原則去處事， 海景個個業主都係書記。（鬍鬚仔而家都係一個義務書記）， 何事要指鹿為馬， 劃蛇添足？？ 

2。議程的先後

議程5.1 係委任義務書記， 5.2 係補選秘書； 目前法團只得六個人， 法團只要手持5票， （九人中的過半數），就可以簡單通過議程， 即使六人當中有一位反對甚至提出修訂， 法團五人組只要唔和議， 就連表決都唔駛。

法團就連“商討”同解釋點解要成立呢個“書記”的職位。會議記錄亦唔需要說明。乾手淨腳。

法團而家係玩緊個遊戲規則。

1月26日， 明明開業主大會要補選委員秘書， 佢專登唔選。（其實法例有要求咁做）， 但佢而家就繼續用管委會5比1的優勢去盡量過會， 加人又得， 支付保固金亦得。反正距離撤換佢的業主大會尚有一個多月， 佢而家係將佢的剩餘權力用到最盡。

咁識得利用管委會製訂業主大會議程及管委會議程的頭腦， （業主大會的議程， 係開會前十四日出， 所以， 即使我地反對都無得改）， 似專登而唔似無 意， 背後的， 唔係高人， 而係神人也。

而家， 只求天可以將智慧賜俾主席五人組的甚餘四位委員， 只要一票， 就可以改寫結果。在公與私之間， 能作出明智而負責任的抉擇。反對或者棄權皆可。

唔明白， 唔知道， 諗唔通， 唔該， 唔好立亂投票。不如將呢D決定， 係來緊要開的週年業主大會， 俾屋苑所有業主決定， 好嗎？ 2月4日決定， 同2月19日決定， 都只係15日之差O者。

法團對大維修的跟進!!!!!!

 

 

 

如果你睇完條片, 再睇番法團2013年1月29日貼出的會議議程第5.4項,

 

商討及議決跟進屋苑大維修承辦商輝煌未完成之工程的事宜及執漏工程及保固金支付事宜;

 

 

你地有乜感想???

法例規定的會議， 我地一定要如期開

原本， 於2012年12月29日的業委會， 法團已經議決， 將鬍鬚仔以5﹪召開的特別業主大會， 於海景花園週年大會同時舉行。

會議記錄應該有相關的記錄。（目前會議記錄仲未出）

但法團又照舊議決後， 突然改變了初衷， 將兩個會分拆， 1月26日的特別業主大會已經召開， 但按法例要求開的週年業主大會， 又無開到。

原本要係業主大會中補選番秘書及三名委員的議程， 又自行修改了。

咁做， 只係為了“自己友”千秋萬代， 永遠唔係業主大會中確認或改選。

合情合理， 同時亦為了要合法，鬍鬚仔今日已經去信民政事務處， 區議員及法團。

信件連結亦敬載俾各位參考。

魔鬼在細節的會議議程

法團於28﹣1﹣2013係大堂貼出會議議程。相信大家移玉步就可以望到。

鬍鬚仔請大家留意一下，


第2項， 跟進及通過2013年1月10日的內務會議會議記錄。


內務會議係乜傢伙？？ 閉門會議是也。只得委員主席幾位小貓三數隻， 大家風花雪月， 交換心得， 所以， 從來內務會議都唔需要出開會議程， 亦無所謂的會議記錄。（因為， 唔係正式會， 無人列席或旁聽）。

情況就等於， CY競選時出席上海仔飯局咁上下。

當日你傾D乜， 講D乜， 既然唔係正式會， 唔影響到大家的運作。

但， 而家法團將內務會擺入管理委員會， 一經確認， 內務會的決定就會變成管委會的決定。（因為已經確認了。）

話說回內務會議， 幾時開， 邊個講， 邊個動議， 動議D乜， 就算你話你有錄音， 但大家唔可以確定到你當日當時何人何時出席， 所以， 唔可以將呢D會議記錄立亂成為管委會的記錄。

正常的做法， 將係內務會議入邊所講的每一樣嘢，重頭開一次管委會， 全部商討， 議決， 列席， 旁聽， 呢D，叫做規矩。

否則， 成為先例， 以後， 內務會就會凌駕管理委員會。只要內務會傾， 管委會通過， 橡板圖章而家改為原子印， 更方便好用。


更大的魔鬼在第5.1項，

5.1, 商討及議決委任法團義務書記協助管委會處理文書及日常事宜


為咗要令到所有業主都參與屋苑事務， 鬍鬚仔而家只係提出呢條好有問題， 大家不妨諗下， 大家齊齊去搵魔鬼？？

我會係明天再談呢一條。

業戶的選擇，新昌繼續為我地服務

有好多已經授權俾鬍鬚仔的街坊打來， 話想知投票結果。係鬍鬚仔疏忽， 漏了將結果公布。

投票結果， 以三分之二的票數， 業主投票決定推翻法團於12月5日的管委會議決， 讓新昌管理公司繼續服務本屋苑直至合約期滿。

鬍鬚仔滿意的， 唔係投票結果， 誠如我之前講， 投票只係一種以全民意向來取得結果的手法， 鬍鬚仔滿意的， 係多咗好多新業主／平時太忙無時間理屋苑事務的業主， 都開始關注屋苑的權益， 有你地的關注同參與，我地海景先可以有條件去逐步改善我地的環垃同設施。

感謝你，無論你係投支持定反對， 起碼， 出席表態已經係好重要的第一步。

以5﹪要求撤換主席

於2013年1月26日業主大會後， 我地已經開始聯署， 就以下事項要求召開業主大會。

1.       議決撤換李淑玲女士作為海景花園業主立案法團管理委員會主席；

2.       議決撤換李淑玲女士作為海景花園業主立案法團管理委員會委員；

3.       如議程2獲得通過，議決委任一名業主以填補海景花園業主立案法團管理委員會委員的空缺；

4.        如議程1獲得通過，議決委任海景花園業主立案法團管理委員會主席。

明白連續幾個月要開業主大會絕對會對各業戶做成不便。既要預留時間投票， 亦可能會對開會場地的業主做成滋擾。

但請大家能體諒， 我地都係希望用最公平的方式來反映海景花園業戶的決定。

暫時統計， 所簽署的業戶數目已超過法定要求， 所以， 星期一， 即2013年1月28日， 鬍鬚仔會將聯署信交俾管理處代交法團主席， 同時， 會將要求召開業主大會的文件副本， 交民政事務署。

鬍鬚仔真心希望各位， 今次只係睇下有無更適合的人選去出任法團主席， 我地大家要以事論事， 我地唔好， 亦唔需要去對任何人做人身攻擊。畢竟， 無論做唔做主席， 大家都係街坊， 過去幾年的屋苑分化， 已經令到大家好厭倦。今次， 我地要改變的， 唔係邊個做主席， 

而係，要改變海景花園的管理風氣。

大會過後的跟進事項

係開會期間，我地都製作短片， 同大家講解咗目前海景花園的境況。

因為唔係所有街坊都到場， 我亦將短片放係個度。

（係度， 特別鳴謝攪製作的街坊黎生）

維修後的海景影片

今朝早， 已經特別向管理公司提出，要求跟進兩點。

1。按法律規定， 海景花園須於2013年2月19日前， 召開週年業主大會。
2。要求法團將我地之前制作的缺撼報告， 提交維修顧問公司同承建商。

唔理法團有無放軟手腳， 但我地一步都唔可以放鬆， 因為仲有二百幾萬的維修尾數未找， 唔可以俾顧問公司／承建商有任何藉口。

業主大會，只係決定一件事的處理方式， 從來都無勝敗可言， 所以， 希望法團亦能以無私的心， 先做好目前的工作。畢竟， 主席及各委員都係672份之一， 為公為私， 都應當以大局為先， 業戶的福𧘲為上。

海景花園缺撼報告

既然業戶已經決定繼續用新昌作為我們的管理公司， 請法團容許新昌為我們居民服務， 批準將之前大家議定的缺撼報告交給顧問公司， 繼續跟進。

1月26日業主大會召開的原因

昨晚因為出席開會人數較多， 未必所有人都聽到我地召開會議的原因，同時， 亦有好多將授權票交俾鬍鬚仔代為授票， 我想， 我亦要在此將宣讀的原文放番係度， 亦希望大家都係咁嘅諗法， 共同去以呢個方向管治好海景花園。

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊




林國棟先生， 朱順雅小姐， 主席， 各位街坊

呢個會， 係我以不少於5﹪業主聯署召開， 而我之前亦已經去信俾各位業主， 講出我的睇法。

對於法團點解要炒新昌， 而新昌又點解釋，相信大家心裡有數。

我開呢個會， 最主要係想知道大家認唔認同法團以先斬後奏的方式辦事。

其實法團已經唔係第一次， 而係一而再， 再而三咁樣去處事。

上幾個月斬樹， 已經係無通過管理委員會議決的情況下先斬後奏， 斬完先再去過會， 另外， 對外招標如是； 連發律師信俾我都係一樣。 我想大家知道， 唔係次次先斬後奏我地都可以補救到， 起碼， 青山公路被斬到光禿禿的六棵樹， 就算我地之後開大會有百份之九十九的人反對， 樹都不能回復原狀。

法團係我地選出來監察管理公司， 但唔代表法團唔需要受到我地監察， 我地對法團的要求好簡單， 守規矩同誠實。

法例有要求， 處理屋苑事務，法團要經過管理委員會議決後先可以獲授權去執行。而開會之前亦需貼出議程通告， 等我地業主知道開會的內容，就關心的議題去參與及瞭解，會議的所有商議內容亦須記錄在案， 方便日後查詢， 作為一份有法律約束力的文件。

呢D， 就係我所講的規矩。

就解僱新昌呢件事， 法團話曾經出過兩封警告信俾新昌， 但我地翻查會議記錄，並無有關的討論及記載， 我地業主無論透過書面或列席會議， 向法團查詢， 但亦得不到任何回覆。法團究竟有無尊重過我地業主？

再者， 關於登報招標事宜，法團又係先出標然後再開會補決。標書內容都未經過管理委員會討論， 標書就已經交到投標者手上。 就算係開會時大家覺得標書上的條款有問題， 都已經為時已晚。 這種自把自為無視規矩的做法， 對我地業主係一種威脅。

喺我召開業主大會的期間， 有不少業戶收到法團的來電或上門游說， 當中涉及好多未曾在會議記錄或法團書信中提及的理由， 例如， 如果新昌係度， 我地部𨋢就做唔成； 又例如， 指控某些業主想聯同新昌搶我地的戶外電梯工程來做， 甚至話新昌管理不善， 以致有單位俾人淋紅油， 以上種種， 以法團一向咁鍾意出公開信俾業戶的習慣， 點解我地從來都未見過？ 係咪口講無憑， 白紙黑字的責任法團唔敢負？

白紙黑字的文件， 是需要負責任的， 十二月五日的會議記錄中記載， 法團於開了一個兩分鐘的閉門會議， 當日約有十多位業主在會議室門外等候旁聽， 但全部都食閉門羨， 究竟係大家鬼揞眼？ 定係當時根本無開過呢個會議呢？？會議記錄係一份法定文件， 我而家想問主席2012年12月5日8：33﹣8：35分， 你同埋七位委員， 係咪全部都在會議室內開會？？我希望你會為你已簽署的法定文件負責任的回答。

呢個就係我地對法團的另一個要求， 誠實。

如果法團事事開誠布公，就再唔需要以電話， 甚至上門方式的遊說工作， 咁就既能令業主免受滋擾，同時所有業戶都收到同樣的訊息，以免以訛傳訛， 做成分化。

最後， 如果大家想改變呢一種以是非代替證據， 以權力凌駕規矩， 將屋苑利益視作政治籌碼的風氣， 在此我懇請各位， 在我今日的第一個議題，  

“推翻海景花園第十屆管理委員會12月5日的決定”， 投贊成票。

至於第二個議題， 議決是否終止新昌的合約， 我則交由各業主自行按新昌所回覆的理由而自行決定。

2013年1月26日特別業主大會

2013年1月26日特別業主大會, 由鬍鬚仔以5%的業主聯名召開。

呢個會, 只係有兩個議決,

1. 議決推翻海景花園業主立案法團第10屆管理委員會於2012年12月5 日之特別會議內議決終止新昌管理服務有限公司的管理服務合約的決定；

2. 議決是否終止新昌管理服務有限公司的管理服務合約。

並無其他議決.

**************************************************************************

法團於12月12日出信解僱新昌管理公司後, 兩天後向業主發出信件, “終止新昌管理公司合約理由”, (注意, 信件日期為12月3日), 提出三點;

1.地政署修樹函件被拖延約四十五天, 管理公司失職

法團提出, 鋸樹實屬「必要」,「若萬一因拖延處理而其間發生交通意外, 全部海景花園的業主均須承擔巨額賠償費, 管理公司會否替業主承擔呢?」

但實情是, 地政總署的信件,到底有無限期?? 有無要求工程須獲得地政總署批准? 係進行任何必要的樹木工程前, 要唔要先諮詢註冊園境師的意見做評估??

鬍鬚仔可以答你, 法團無做!!!!參考信件(地政署的回覆)

我都只係照copy and paste, 「若萬一因法團眾委員鋸樹而令海景花園被控告或罰款, 全部海景花園的業主均須承擔巨額賠償費, 主度及委員們會否替業主承擔呢?」

呢個問題, 我問咗法團 (參考信件), 法團唔肯覆.

同時, 在10月20日的會議記錄中,第3.5項,對於地政署修樹函件,「主席要求管理公司須聯絡王氏利豐將評估費用下調至$1,500, 管理公司表示會盡快回覆。」

既然緊急, 既然須承擔巨額賠償費, 何解法團只係講價而無做作何決定?? 而係十三日後, 突然醒起呢單嘢好緊急, 突然決定「鋸樹??」

法團一再提到管理公司不專業, 但實情是,10月20日的會議記錄3.5項, 管理公司以其專業向法團解釋,「本苑之地契有樹木保育條款, 故地政署現要求法團於處理前必須委託園藝及樹木護理專業人士進行評估及進行修補及治理」。

法團豈可將「無知/不專業」的責任推給管理公司?? 文件, 證據, 絕對不會騙人。

2.管理公司凌駕於法團

法團認為管理公司自把自為, 事先引入有意提供電訊服務公司的職員進入屋苑進行堪察, 同上, 事前亦沒有知會法團。

但按照2012年11月14日的會議記錄4.9項 有以下記載,

「委員黎浩強續查詢於6月6日管理公司於和記視察屋苑的安排, 管理公司(與)當時在任的一名委員一同視察, 而管理公司亦沒有擅自批准工程。」

6月6日, 當日是由法團委員陪同和記一同進行堪察, 提交建議書, 管理公司蓋章收取, 6月30日提交動議, (2012年6月30日的會議記錄4.2項, 和記寬頻早前交來計劃書, 希望可於本苑增設有關服務。 有委員表示先再詳細研究有關計劃書。) 7月12日, 管理公司電郵通知和記有關申請未獲法團通過故拒絕有關申請。

11月3日和記在青榕街舖設光纖, (在屋苑外圍), 與我們何干?? 這個解僱理由是否成立??

(參考文件, 法團致管理公司的警告信)

3.為何所有工程皆要新昌總公司批核??

法團認為, 於9月份批核修理兒童遊樂場的保護軟墊, 新昌截至12月3日仍未完工。

參考10月20日的會議記錄, 3.4項,「法團早前開標並初通過委托捷時進行更換遊樂場安全軟墊工程, 並於是次會議補決」

「管理公司已通知捷時有關事宜, 工程預計於11月中展開。」

參考11月14日之會議記錄, 4.9項,

「有關工程於10月20日之管理委員會中議決, 由於承辦商送貨須時兩個月, 管理公司於會前多次聯絡承辦商, 承辦商回覆預計下星期送貨並會安排安裝。」

欲加之罪, 何患無詞??

*******************

唔係喎, 鬍鬚仔, 法團有人打電話問佢拿授權書, 所講的內容唔係咁架喎. 講一大輪, 完全係兩回事, 鬍鬚仔會想請問, 既然法團有咁多理據, 管理公司非炒不可, 點解, 我地一班業主想問你, 你完全龜縮???

鬍鬚仔出信問你關於鋸樹問題, 唔覆。

12月5日成班業主等你開會, 你o個個開咗兩分鐘的會, sorry, 好多業主都唔覺你係會場喎;

12月29日, 成班業主天寒地凍等你想問你關於鋸樹同炒管理公司的理由, 你話係AOB時間大家討論, 但一去到AOB, 你即刻雞咁腳走咗去.... 成班等你的業主O晒嘴喎.

一個人講咗, 負唔負責任, 就係睇佢肯唔肯用文字/開會來記錄佢的話語, 因為, 文件容易證明係咪講緊大話, 係砌詞狡辯定係以理服人, 講過的說話你可以抵賴, 但寫低的文字/會議記錄, 則千秋萬世, 人人睇到的都係一樣的話語.

各位業主曾經留低電話俾管理處/法團作緊急通知之用, 但法團拿呢D電話打俾各位業戶, 係咪不當使用個人資料, 各位可以自己決定點去做; ( 參考個人資料(私隱條例)附表一第三條, 第3原則, 個人資料的使用)至於法團天花龍鳳咁去講幾大堆問你拿授權書的理由, 鬍鬚仔建議你地叫法團學我咁, 以白紙黑字, 以文件, 用理據咁去講, 要對自己講O既說話負責任; 鬍鬚仔堅持做公職要 「開誠布公」.

我地不斷咁希望法團同我地講原因, 你唔肯, 但擰轉頭就猛同某部份業主不斷咁去打電話講, 不如將理由公開, 等大家一齊傾吖. 我地海景業主, 唔係唔識睇文件, 唔係唔識思考架喎!!!

因為好多人都未必睇網誌, 我將以上呢篇文章, 撮要寄俾各位業主, 同時亦要就我所講的說話提供證據, 以佐各位投票決定時考慮!

到底， 法團知唔知乜叫做公職？？

公職， 即係係為眾服務， 係唔係個個都明白點去做？？

公職唔係無上權威， 唔係成為皇帝， 相反， 公職， 正正就係要無私，透明。

而家法團不斷咁去拿授權票， （其實， 鬍鬚仔何嘗不是？？）， 但， 大家有無聽到好多從未曝光的理由？？

有街坊話， 法團不斷咁去講管理公司好多問題， 又話人地食錢， 又話人地工程報價貴。（貴你咪唔揀佢LOR， 咁都炒得？？佢貴你都揀其他工程公司啦？）

請問， 既然係有咁多不滿， 法團有無開過會， 將呢D不滿正式向管理公司講？？

有無出過信， 要求人地解釋？？

公職， 就係做乜， 諗乜， 都要留低證明， 你有無唔妥， 白紙黑字咁俾人知， （包括我地）， 人地回覆， 亦要向番大家展示。

咁法團有無咁做先？？？

而唔係你地幾個人串串是非， 無憑無據的講下就算。

法團只係出過兩封警告信， 而之前炒人， 向住戶派信， 所提的理由亦只有三個。何解突然間又多咁多是非？？

有個好支持法團的街坊有人同鬍鬚仔講， “D （原文係粗口）， 炒佢咪炒K佢LOR， 駛L俾理由呀。”

如果係你的家事， 你的公事， 鬍鬚仔無權去干涉。但而家講的係公職， 係屋苑的事， 炒或被炒， 唔通我地業主無權知？？ 定係你地有乜唔想俾我地知？？

鬍鬚仔忽發奇想。。。。如果新昌真係要走， 下一間管理公司， 服務我地屋苑的人， 係黃子興先生？ 定係陳子儒先生？？

如果真係中， 大家買六合彩， 記得問鬍鬚仔拿貼士！

到時咪問鬍鬚仔， 點解撞到撞得中？？ 天機不可洩露也！

寧願輸得漂亮， 都不去為勝利而無耻

多謝各位街坊的報料， 有人不斷借部戶外升降機去拿授權書，

有D聽到係， 如果想起得成部戶外電梯， 就要俾授權書法團，

亦有D聽到係， 星期一見到鬍鬚仔， 管理處同戶外電梯顧問開會， 不斷咁去質問人， 話鬍鬚仔同管理公司， 都係想推翻唔整部戶外電梯， 所以， 管理公司非“炒”不可。

對於我之前同顧問開會所講的說話， 我已經係早幾日放係個BLOG度， 正大光明， 屈得出， 我鬍鬚仔受得起。

我斷唔會為咗要贏， 明知個合約有咁多漏洞都唔去填補； 鬍鬚仔一向性格都係咁架啦。

但， 有好多支持鬍鬚仔的公公婆婆去幫手拿授權書， 點解都要誣告埋呢D公公婆婆？？ 點解要講到人地公公婆婆有利益收受， 講到人地係為錢去做事？？

我同呢班公公婆婆講， 唔駛一定要勉強去拿授權票， 唔好再俾人詆譭， 佢地反而調翻轉頭來安慰我， 話唔緊要， 只要求我去做個澄清，佢地仍然希望能為我多拿幾張票。

如果， 只憑法團講幾句大家就信到十足的人， 這些票， 不要也罷。

我不為權不為其他， 只是將我認為海景的問題說出來， 如果得不到支持， 這， 也是海景街坊的選擇。

衷心感謝一直義務幫助我去拿票的各位街坊（無計， 鬍鬚仔識人唔多）， 我是勝亦欣然敗亦喜， 因為， 我已嬴得你們的支持，我只做我該做的事！

寧願輸得漂亮， 都不去為勝利而無耻！！！

向戶外電梯顧問公司郭浩提交報告

業主代表向戶外電梯顧問公司（郭浩）提出的幾點疑問報告

出席者 ： 戶外電梯顧問公司（郭浩） 代表

      海景花園業主立案法團主席  李淑玲女士

                   2座2B業主代表，2座15B業主代表， 3座22B業主代表

                   3座2位業主代表

                   管理處陳經理， 甘小姐

地點 ： 海景花園多用途室

時間 ： 約11：45分

是次會議， 主要是由業主代表向戶外電梯顧問公司反映業主對工程的疑問以及希望就合約澄清， 大家同意就各項疑問及希望澄清事宜， 編製報告， 由管理處或業主立案法團向顧問公司提出， 希望得到顧問公司的回覆。

1.     就顧問公司的合約， 內裡提及興建該戶外電梯， 有一個“封頂價”， 業戶提出， 該封頂價是否包括VO （Variation Order) 及AI （Architecture Instruction)？ 換句話說，工程總價會否超過封頂價？？ 業戶希望顧問公司澄清， 讓法團及業戶免於誤會。

2.     業戶希望， 如果工程出現VO或AI， 必須要通知海景花園各業戶。（當然由法團決定通知的方法）。

3.     由於是次工程涉及多間公司， 例如電梯公司， 承辦商等，業戶恐防各不同的公司會就施工， 安裝，等出現爭拗， 責任的界定並不清晰， 希望顧問公司能就不同的問題及責任能加以確定， 避免將來問題發生而互相推卸， 業戶們根本不知該向那戶追討。

4.      

      

            承上圖， 業戶與顧問公司在現場拉尺量度， 發現地盤位置遠遠細於圖中      的OPEN CUT FOR FOOTING的要求， 顧問公司代表向業戶表示， 需就   該圖及施工方法將作出修改； 謹此記錄。

5.     承上圖， 有業戶表示， 圖中並沒有將任何視線所見的障礙物如柱躉， 樓梯， 花圃， 圍牆等繪畫在內，以及對於未能出現在視線範圍的障礙物如地下污水渠（如有）， 雨水渠等（如有）， 顧問公司能否出示圖則以則定施工方法， 但顧問公司未有作答， 謹此記錄。

6.     業戶表示，如果電梯頂能稍作傾斜， 是否能對電梯頂的去水更有幫助？ 顧問公司提出， 可在梯頂的水泥厚度稍作調整， 謹此記錄

7.     業戶表示，位於地下電梯門的雨簷， 是否可作修改而使其更穩固？ （業戶曾向顧問公司代表查問，如狗臂架等是否合適？ ） 顧問代表回覆將會研究，謹此記錄。

8.     業戶表示， 如在晚間， 光線不足， 雨簷上是否需要加裝照明設備？ 顧問公司代表回覆將會研究， 謹作記錄。

9.     業戶查問， 由於平台升降機門將會高於外圍的花圃， 接駁之斜台因較接近花圃外圍， 恐怕會對乘客做成意外， 又或因業戶的不小心，高空墮物而容易傷及在地下等待電梯之乘客， 希望顧問公司能提出解決方案。

10. 而在平台升降機接駁之斜台，需於斜台底部連接平台， 業戶恐防工序會傷及平台的防水層， 希望顧問能將提出在工序上不會破壞屋苑平台防水層之做法， 顧問公司代表未有作答， 謹此記錄。

11. 業戶亦要求， 所有連接所用的螺絲， 包括是安裝救生梯， 平台斜台， 接連石屎部份， 均指定採用＃316不銹鋼螺絲釘， 以便日後的維修。顧問公司代表未有作答。謹此記錄

12. 有業戶提出， 雖然顧問公司有指定施工準則按“General Specification for Building” published by Architectural Services Department, 2007 edition. 但為方便我們法團及業戶對工序的條件及規範較易掌握及監管， 建議將釘板扎鐵落石屎等工序的施工要求等， 都將之加在標書的內容， 避免承辦商以疏忽， 以及讓我們能簡單按文字理解。顧問公司未有作答， 謹此記錄。

13. 有業戶認為， 標書中對工程時間的限制太寛鬆， 而同時工程亦由多間公司參與， 為界定好工程的延誤由那一方負責， 亦同時避免由於我們未能作出時間上的配合而被索償， 建議， 承辦商的工程時間改為由收到開工紙起始作生效，而由於顧問公司代向電梯公司訂購， 故亦要求顧問公司在訂購電梯時作出送貨時間的要求， 利用合約去限定各部份的時間上配合， 顧問公司未有作答， 謹此記錄。

14. 對於在圖中表示的氣窗， 逃生門， 電梯口等， 雖然已經載於圖中， 但由於法團及各業戶對工程不是專家， 建議將所規定的尺寸， 要求等， 都全部寫在標書中， 以便大家有一個較簡單及容易監管的方法去作出驗收或計算， 顧問公司未有作答， 謹此記錄。

15. 業戶對於標書中對承辦商要求有合資格人士監工，要求指定該TCP的資格。顧問公司未有作答， 謹此記錄。

16. 業戶亦提出，標書的報價在設計上， 某些項目是否能連合在一起， 例如， 安裝閉路電線的管道， 應該同時指定安裝閉路電視， 以避免到時， 閉路電視未能運作， 但我們仍需要支付安裝閉路電線管道的費用等等， 顧問公司未有答覆， 謹此記錄。

由於顧問公司代表趕著離開， 業戶的意見亦暫時到此為止。本人謹將提出的各點製作報告， 並希望法團能代表業戶， 向顧問公司遞交此報告， 並責成管理公司去向顧問公司追問結果／答覆。