合法地「食你夾棍」！！！！！

上一個網誌， 講咗顧問， 法團， 承建商的關係。

之前維修， 馬海係顧問， 輝煌係承建商， 馬海製訂工序同施工準則， 輝煌照住做。大家好易明。

但， 同樣的方法用係興建電梯， 錯晒！！！！！！

***********************************************************************

上一個網誌， 都有講， 你要去畫， 畫到天花龍鳳都得， 但， 施工o個個， 未必做得到。

天空之城， 你可以想像點去做， 你去做時， 完全無限制， 例如隔離有無「樹」（雖然法團已經幫手除去了）， 無柱，無樓梯， 地下無雨水渠， 甚至唔知地下係唔係沙泥地等等。。。。只要你承重， 結構過關， 計啱數， 實批架。（法團咪大大隻字話， 法團好辛苦好辛苦好陰公咁批咗個圖LOR）

但你要人按圖施工， 如果學鬍鬚仔話齋， 做唔到， 咁人地又入標？？

因為， 呢個世界有VO。（Variation Order )

************************************************************************

乜叫做VO？？

VO， 即係， 我照你個圖去做。。。但發覺有一D解決唔到的施工問題， 就要求你改施工方法， 你錯漏越多， VO越多。

請恕鬍鬚仔唔將郭浩個合約放上網。（畢竟， 而家尚在承辦商投票的階段， 所以， 如果任何街坊要睇， 可以電郵鬍鬚仔， 在核實身份後， 鬍鬚仔亦樂意俾大家參考）。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

合約中第六頁， 3.7項

3.7  有關後加工程

a) 在獲得法團及管理公司許可下， 發出建築師指引（Architect's Instruction) 及變量及變項指令（Variation Order) 予合約承建商，  法團及管理公司

b) 如需要更改工程細則， 本公司會向法團提供建議。

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

法團成日話鬍鬚仔對屋苑事務別有用心， 咁鬍鬚仔就學簡先生話齋， 你就當我係來海景「搵食」， 我而家問你地點防我。

例如 ：

故意係畫圖時， 製造唔明白的地方， 亦欺負你地法團乜都唔理又唔識睇圖， 你唔反對我就過     關。

大家都明白， 工程會有VO。（即係， 隨時會有變更）， 所以， 越多錯漏， 越多VO， 亦越多「打死狗講價」。

要令你落搭， 鬍鬚仔甚至俾張好牌你上， 「放心， 即使有VO， 我唔收錢」， 筍未？？

（哈，「發出VO指令唔駛錢， 但VO個工程， 要俾錢架喎。。。你唔同意個VO？？ 咁承建商做唔到， 咁就「收工」架啦喎， 麻煩你俾晒成個合約的錢。）

當日， 維港填海， 徐家辰， 陸恭蕙， 咪去司法覆核， 唔俾人起個灣仔繞道？？ 停工四個月。成班工人坐係度晒太陽， 日日白收人工。呢個VO， 情形一樣。碰著咁咁天真的法團， 唔食白唔食吖。

「合約第7頁4.3（a ) : 在保固期滿時， 本公司將結算合部工程總工程金額， 並根據原來合約金額， 工程期間所變動之金額及以付之中期糧款， 計算工程餘款予法團， 管理公司及合約承建商作存案。」

（提晒你架啦！！！！！）

至於， VO個工程， 可以有幾大， 可以有幾貴。。。哈哈， 唔知架。改雨水渠（駁去水塘的渠， 要同邊個部門申請？？要幾耐去批？？ 如果因為個VO而令到承辦商開唔到工， 法團又要賠償俾所有工人同公司）

又或者， 部戶外電梯靠近條柱， 到底柱下邊係咪都有FOOTER？？ （大家唔會以為， 條柱只係好似拜神香雞咁插係個地下掛， 下邊一定有一大舊FOOTER頂住條柱） 個FOOTER有幾大？？ 會唔會同部戶外電梯o個三個FOOTER重叠， 頂住？？ 

如果因為個FOOTER頂住而做唔到戶外電梯個地基， SORRY， 唔係承建商的責任， 承建商唔可以開工， 唔該你乖乖地咁找晒所有承辦商的數。

所以， 睇落好似部戶外電梯銀碼唔到， 呃到你幾多吖。。。分分鐘， 掘開個地就收得工。抵唔抵玩？？

甚至， 係平台將條鐵梯釘係地面時， 我唔知有無水管架。。。。一嘢扑落去穿咗， 停車場係咁滲水， 你俾唔俾錢整？？（Sorry喎， 合約無講我要包平台防水架喎， VO啦）

睇番合約個條文， 只要法團許可及管理公司許可， 俾你做法團， 我俾VO你， 你許可定唔許可？？ （漏水係你屋苑， 關我叉事， 顧問公司， 承建商， 甚至簡先生， 都唔係你屋苑度住）

所以， 只要我咬到個法團肯簽， 以後邊個做法團， 我都「食硬你」。

嗱，呢D「搵食」橋段係絕對合法， 鬍鬚仔咁蠢都嗡得出， 出邊做工程的大鱷， 點會諗唔到？？ 

唔知， 法團仍急住去簽約？ 定係去諗掂點樣唔令到我地業主唔俾人呃呢？？？

＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

我承認，我對法團眾人有懷疑， 有以下理據。

1。點解， 唔俾業主同管理公司去信要求顧問澄清工程的問題？？ 點解要用無白紙黑字記錄的「面談」代替書信往來。？？

2。點解， 由揀顧問， 到戶外電梯的牌子， 型號， 甚至拿晒去畫完晒圖， 都無公開過資料？？ 甚至， 業主想去睇下份戶外電梯合約， 法團都話係機密？？

3。點解法團成日要擺管理公司上枱， 甚至生安白造咁去砌生豬肉？？ 千方百計都要去換經理換公司， 目的只係要求管理公司「唔好多事」？？

4。點解， 而家已經去到承辦商回標的階段， 我地對顧問公司提出的種種問題， 關乎個工程施工， 電梯安全等， 所有問題係承建商未回標前我地已經拿拿聲趕好份報告俾法團， 但法團點解要出通告， 要等人地回晒標後， 先叫大家「面談」？？ 等大家更加唔夠時間去監察？？

既然法團都已經唔講章法， 唔依規矩， 唔聽民意。。。。鬍鬚仔只好將個決定同疑問交俾大家考慮。